Ambo dulu oghe kapung. Besar di Kapung. Ambo beghanak di Kapung kube getah, dekat Kube Kiat sebelah hilirnya, Tanjung pagar dan seberang Mase di sebelah hulunya. Alik Hnaiknya pulok kapung Pasir alik jjatuhnya pulok kapung Panje.
Muloh ayoh ni tak dok kijo melain wat padi so kkaro jah. Celik-celik mato ambo dulu hanyo kena padi jah, Dari semusim sapa lah wat padi dua kali setahun, lo ni denga kabarnyo oghe tane padi tak dok doh mace dulu. Dulu Ggalo paka kuba sekaghe ni paka mesin belako. Dulu sakit pingge-pingge tunduk dok ccedung sekare ni oghe menabur. Dulu mengete hanguh pipi-pipi pasal panah, lo ni paka traktor. Mudoh belako.
Penat wat kijo kapung oghe dulu-dulu caghi hmene lepah kijo. Sebut pasal hmene ni ambo teringat maso kecik-kecik dulu.
Kapung ambo maso tu tak dok api. Letrik ni ambo kenal maso besa dah. Maso BN meretah. Dulu tak dok letrik oghe kapung paka pelito jah. Male-male jjale gi tengok tv pase karak. Karak pulok wat denge daun nyor. Tengok tv maso tu male sabtu ada cerito melayu. Tepat tengok tv pulok tak dok lah jauh mano. Buleh denga enjin generator duk dumah. Bbunyi jah jenerator ambo gelepa tak leh duk ngamok nok tengok tv kelih cerita hantu. Ada skali tu tengok ceghita Pontianak lakune Ahmad Daud. Takutnya alah kelik jale bekepit nge muloh Mak wo, tengoh jale nyo kosek pulok ko budak-budok, betempik ambo laghi…Sukonyo ingat jame dulu… Tengok Tv ni supo hmene jugok jame ghitu pasal tak banyok hmene supo lo ni…
Masih ingat lagi sebaik habis jah musim mengete, arwah abe Seme (Seman wau bule) yang sohor dengan dikir barat pakat-pakat denge awak-awak kampung likung padang rang dengan supit putih (supit atap tembakau) wat dinding untuk kutip teket berdikir. Petenya pulak ada lah bin (anak lori) masuk kapo gege bunyi speka sambil tabur sakla male ni ada bedikir tuke karutnya seman wau bule. Abang Seman ni maso tu masih muda belia lagi, dia ni buke oghe lain denge ambo duduk pun tidak jauh mano dalam sepenanak nasi bejale jah. Dia di sebere Beta ambo di Kube Getah. Tok Nye dia pulak bekait waghih dengan tok Nye ambo. Maka penuh lah kampung Kube Getah maso tu oghe ghama pakat maghi jauh dekat nak tengok berdikir.Male ceghoh supo sie, sie teghe supo tak dok male. Sukonya dok kkapung maso tu.
Abih bedikir ada pulak waye kulit. Tuk Dalenya Pak Loh Baju Meghah, mulah belako doh la ni. Waye Kulit ambo tak dan beso mano masa ambo kecik kerana arwah ayoh ambo tu lebai sikit dia tak berapa nak bui gi sangat tengok waye kulit kerana maso tu hmene waye ni hmene oghe mudo-mudo. Selalunya maso hmene waye kulit ni akan ado lah oghe begocah oghe betetak. Zame tu oghe kapung tak leh lepa nak betetak , kebanyakke nye betetak pasal dende lamo berebut kuba berebut lembu berebut ttino. Maso hmene ginilah demo betemu mata dan pakat tunjuk masing-masing meto. Tapi ambo de ingat waye kulit ni beberapa kali main di Padang Rang kat ghumah ambo.
Ambo ingat lagi ada saing ambo nama Supi denge Seghi. Dia ni adik beradik kembar anak muloh Mak Cu Melah. Demo ni male-male ngaji ghumah ambo. Dia dua beghadik ni nakal tak dok oghe lah zaman kecik dulu. Ada skali tu musim hmene waye Kulit di Padang Rang kat kampong ambo. Asal silahnya oghe kapung tak beghapo nak bui hmene waye kulit di kapung maso tu bokte begocah bertetak. Tapi pasal layar dah pase, waye main juga male tu. Nak jadi cerito Supi ngan Seghi ni, ayoh dia denge muloh mok dia tak berapa berkene hmene waye kulit tu di padang rang. Mako Supi nge Seghi ni Pete tu dia pakat-pakat caghi belalang. Balik kumah dia campur nge tahi boh dale supit. Pah tu kocak-kocak nge belale dale supit tadi. Male tu dia bawa gi tempat Waye Kulit. Pah tu dia lepah kat oghe ghamai… Apa lagi, Belale pun tube merata-rata cari cahaya api. Ghama lah oghe tepege terpetak belale tadi, apa lagi habih lah bau taik!.
Lepah musim mengete juga ghama oghe main kertok. Amat lepah Ggorib jah, tak dan nati Isa kertuk pun bbunyi merato-rato kapung. Dok kapung ambo buleh denga bunyi kertok di Chekok, Kemubu, Keda Piah, Lunde paku, Kube Kiat, Kadok, Pade Tengoh, Alur Mase, Tok Kong. Buleh kato bunyi so keliling kapung. Beraso bena hati nak gi tengok oghe main kertuk tapi muloh ayoh tak bui pasal balik tengoh male. Kesie dok minta nak gi tengok tak bui, mullah ayoh ni buat kertok nge buah nyor. Suko gak ambo palu kertok nge buah nyor… ketuk! Ketuk! Ketuk!...
Hmene tadi oghe main male. Sie pulak maso tu oghe main besilat tari. Silat tari ni lamo dari pete sapa male. Ghama lah tok Ddekar seluruh negeri merata chawat main silat tari silat pulut. Musim mengete jugak tok-tok ddekar ni buko gelangge. Ambo de belaja silat pulut kat ghumah nge tok ddeka semail dok ujung kapung. Muloh doh dia ni. Lepah belaja silat kita belaja tukat. Abih belaja mula lah nak sudi oghe tu nak sudi oghe ni, masing- masing tunjuk meto tak leh lepa tengok oghe melitah masuk kapung tak dok kijo lain, ko dok caghi butir nok ajok begochah jah.
Teringat juga ambo maso kecik kecik dulu, abih ngaji quran tak dok kijo lain terus lopat turun main bbidah para. Tage getah banyok-banyok wak kon pital main bbidah para. Getah orat penuh dale supit, hok dok llenge tu pah ko siku. Habih main bbidah para main pulok bola awa, bola kaki tiga dan mace-mace hmene lagi maso tu. Kalu tak dok gu jate buleh main dnge budok ttino. Main ddecak, main selambut, kucing petap, badak ayu-ayu pun ambo main nge budok ttino. Main badak ayu-ayu ni suko. Sapo laghi tak de ghukah pohon kayu kena jilat ko babi. Sapo tak de laghi keno jadi ibu.
Habis musim mengete masuk musim bah. Musim ni tak banyok hmene buleh main. Huje tak bereti ghata-ghiti air penuh dale kapung. Maso budok-budok ni kepala tak pikir benda lain melainkan hmene. Musim huje ambo budak-budak main bedil ceracak. Buat bedil sendiri buh buluh jadi mata, turun ke sawoh mengharung air bah bbedil ike. Puye baah lagi suko ambo maso budak-budok. Banyok lah buleh ike rue ike keli. Ike ppuyu payoh sikit pasal dia leper.
Celik mato alik pagi hungga gi tengoh pade, tengok air mmenuh seluruh kapung. Anak padi habih tenggelam nampok pucok jah. Maso tu lah nak tehe taut, nak tehe bubu, nak tehe jaring… Alah ko pete sikit tak dok hmene lain ghama-ghama turun gi menetak ike dale baruh. Nanak tahun tepo golok. Muloh tok ni kebetulenye tuke besi. Musim boh jah jenuhlah ambo cari besi nak tepo golok wat menetak ike. Nak caghi besi maso tu tak payoh, caghi jah taka timbo atau taka bledi hok tok paka. Taka bledi ni banyok pasal muloh tuk ambo dulu menoreh getah. Beldi hok dia tak pakai tu buleh lah ambik takal tepo wak golok. Golok dumah ambo ado dale dua tigo belah bilah… ado lagi sapa lo ni.. jadi kenange maso budok-budok dulu…
Gi ngaji quran puye bah ni ambo tak gi ngarung air. Ambo gi naik cik Njing. Cik Njing wat nge buluh. Buh tapak nge kayu tengoh-tengoh pah tu jale lah dale air dale boh. Lagi tinggi lagi biso. Oghe tuo-tuo pulok tak dok paka paying. Nak beli paying masa tu mahal oghe kapung tak dok pitih. Demo paka same jah buh atah ppalo buleh wat gi ccerut rumput ko lembu dale huje.
Abih musim huje musim bah masuk lah pulok musim kemara. Agok-agok dale awal tahun. Maso ni padi pun dah besa dah ada sekerat peha. Buah padi pun dah hija.. Padi masak dale bule tigo lebih kure. Musim padi masak adalah musim mengete. Jenuh lah pulok budok-budok maso tu tak gi skolah tulung mok ayoh mengete. Kalu musim mmukul padi, ambolah hok mmunggah padi dari tengoh pade wak balik kumah pikul dale gguni. Kalu ada basikal unta buleh lah punggah paka basikal limo ne gguni sekali punggah. Lepa mato mok buleh pikul so gguni gi jual rumah berahim Mekyah Kubur Tok Akop buleh lah sepuluh rial. Sepuluh rial tu buleh lah wak gi bejale raun kota bharu hari sabtu menebeng kot stesen bas..
No comments:
Post a Comment