nadzri: Beli baju ghayo anok

Haghi ni, sabtu 4 bule semile 2010 bersamae 25 ramadhan 1431H. Hari cuti tak kkijo. Lepah subuh pagi tadi ambo tido tekejut bedegar nyo kosek ko anok. Demo tu gege dok ngajok nak gi beli baju ghayyo. Nak maroh pun, janji doh haghi ni nak gi bbeli ke puak-puak dio. Baso dia lah budok-budok. Time nok ghayo ggini suko bena bila ppakat beli baghang beghaya.

Caghi baju ghaya tidaklah susoh sangat. setat kegheta kalu gi alah kulu ko seremban, alah kilir ke Kola lupur. Alik hnaik ke Kajang atau Putrajaya, alik jjatuh Nilai 3. Sebut jah mano, buleh gi janji ada pitih so kkagho.

Tubit pagi-pagi kelik puko 3. Ada sekeghat kegheta bbeli baghe ghayo. Baju gaun ado, baju t shirt ado, seluar jeans ada, pendek kata kalu buleh alamanda Putrajaya pung nak beli wat balik. Gilo sungguh beli baghang ghayo. Ambo pulok tak leh nge anok-anok. Taghik tange sikit tunjuk nak ggotu ggoni, tak sey beli kan ingat ko anok. Beli kan, menengung ada seminggu sebab habih pitih.

Sebut beli baju ghayo ni, teringat ambo zame budok-budok dulu. Haghi mulo-mulo poso tu sebut doh nak beli baju ggapo ko muloh ayoh. Suko sangat kalu masuk bule poso, sebab muloh ayoh akan beli baju baghu. Tiap-tiap haghi tanyo muloh ayoh bila nak gi beli baju baghu. kalu sebule posa, duo tigo haghi nak ghayo baghu beli. Ambo masa tu pong tak pehe bakpo. tapi ghapat nok ghayo baghulah demo sibuk pusing kedai caghi baju ghayo anok. Ambo pulok kughe 3 haghi nak cukop sebule teringat ko baju ghayo. Haghi-haghi sebut. Buke apo, zaman dulu kalu tidak musim ghayo jange haghaplah oghe tuo beli baju baru. Seingat ambo bab beli baju baghu ning hanyo dua kali setahun jah. Bule 12 nak masok kelah baghu denge bule poso dua tigo haghi nak ghaya. Kalu tidak jange haghap nak baju baghu. Ghaya haji pun paka baju lamo. Baju ghayo poso tak jejah lagi.

Gi beli baju, tidak lah jauh mano. Ambo tak kenal Kota Baghu. Kedai ssohor maso tu ialah kedai Beghehim Cina di Kedai Teghe. Beli baju ghayo ning muloh ayoh tak pernah bawak gi supermarket. kalu ado pun maso tu tak kenal supermarket. Pernoh jugok mok ambo keno maghoh ko muloh ayoh bilo dia ajak bbeli baju ghayo anok di Kota Bhaghu. Muloh ayoh kato wat penamo beli di Kota Baghu, tambe prebet sapu pun tigo amah soghe, wat ppunoh ke pitih jah. Pade beli di Keda Teghe pun belana kok na doh.

Buleh baju sepase ambo simpe dalam almaghi saye nak paka. Haghi ghayo pun paka semeta-semeta. Bimbe takut cemar. Mugo baju sela. Selua pulok ambo tak pehe bakpo muloh ayoh ni suko sangat beli selua pendek kala bighu. Ambo tak sey pun hak tu lah nanak tahun dia beli. Ghupo-ghuponya supo nge selua skolah, buleh paka jare-jare wat gi sekolah.

Beli kasut ghayo pun satu hal. Ambo paka kasut saiz 4. tapi muloh ayoh beli saiz 5. nanak tahun dia beli kasut besar. Sebabnya mudoh jah, buleh paka tahun depe. kalu ambo tak gi sekali, male-male dia ukur tapak kaki paka daun rokok. Hati ambo tak puah sokmo pasal nanak kali beli tak pernoh keno.

Antaro baju ghayo yang paling ambo nak sangat ghitu gak baju oghe terbang 'Ralph' hok rambut kerotok. Berjerit sakan ambo mengamok nok baju tu muloh ayoh tak sey beli. dia kato wat mmunoh jah, oghe tak pakai wat ghayo baju belah tu. Maso tu TV tengoh ssohor ceghito 'The Great Amarican Hero'. Paka baju tu seghupo lah dengan superman haghi ni. Buleh wat teghebang. Dok atah ppalo tanggo terjun tughun. Kalu tak make hmiat, keno lah penampar sebutir duo. Buleh pakai baju tu ssohor ko saing-saing seminggu tak pecat. Bbalah gege nge mok ambo sebab dia kutip basuh, ambo tak bui dia ambik pasa nak pakai nanak haghi. Hok paling sedap bila pakai baju tu time naik basikal. Dia ada sayap alik belake, perase seghupo tengoh teghebe, mulut pulok tak begheti nyanyi "biliebit oronot oooo woking noneyy ..." (believe it or not, oo walking on the air...)

Suko ingat jame budok dulu...rego baju tu lima amah jah (2.50). Tujuh amah sekali nge selua. Banding nge baju anok ambo lo ni, sepase kat dua ratus...baghu soghe..pakai tigo pat kali, cemuh doh, pah ngamok nok baju lain.